Wargeyska Financial Times ee qoray warbixinta la wadwado, laba arin ayuu sheegay.
1: Ta koowaad waa in Mareykanku xidhiidh la sameeyey madaxtooyadda Somaliland, lana bilaabay wada-hadallo lagu aqoonsanayo Somaliland , taa beddelkeeda uu Mareykanka helayo saldhig milatari oo uu ka dhisanayo meel u dhow dekedda Berbera ee gacanka cadmeed.
Mandaqada ay Somaliland ku taal waa mid istaraatiiji ah oo dano badan kaga xidhan yihiin dawladaha aduunka, hadday tahay dhinacyada amaanka iyo dhaqaalahaba. Somaliland waxay ku taallaa xeebta Gacanka Cadmeed, meel u dhow marin biyoodka muhiimka ah ee Bab-el-Mandeb. Marin biyoodkan wuxuu isku xiraa Badda Cas iyo Badweynta Hindiya, wuxuuna yahay mid ka mid ah marinnada ugu muhiimsan ee ganacsiga aduunka. Dhinaca kale Dekedda Berbera waa xarun ganacsi oo muhiim ah. Waxay si gaar ah muhiim ah ugu tahay dalalka aan badda lahayn sida Itoobiya, taas oo u sahlayso in fudud ay suuq u hesho. Sidoo kale Somaliland waxay muhiim u tahay amniga marinka Gacanka Cadmeed, waxayna door ka ciyaari kartaa ilaalinta maraakiibta marinka maraya iyo la-dagaallanka burcad-baddeeda iyo argagixisada ku sugan mandaqada. Qiyaastii boqolkiiba 12% ganacsiga caalamiga ah ayaa mara Badda Cas, oo u dhow xeebaha Somaliland. Shidaalka aduunka ayaa mara marin biyoodka Bab-el-Mandeb, waana waddo muhiim u ah dhoofinta tamarta laga soo raro Bariga Dhexe una sii socota Yurub.
2: Qodobka labaad waa in Mareykanku
soo jeediyay suurtogalnimada in qaxooti laga raro Maraykanka iyo Gaza loo wareejiyo Somaliland, balse tani ma aha qodobka ugu muhiimsan ee wadahadalka. Waana qodob aan Somaliland ku gaar ahayn ee Dawladdo badan lagala hadlay sida Suudaan, Masar, Jordan iyo Imaaraatkaba.
Sidaa marka ay tahay, Mareykanku Somaliland wuu aqoonsanayaa, iyada oo aan hal qof oo Falastiini ah la keenin. Somaliland Ilaahay ayaa bogcad muhiim ku abuuray, taas ayaana sida Maqaalkaba lagu sheegay aqoonsigeeda keenaya.
Qodobka qaxoontiga Falastiiniyiintu maba aha mid meesha yaala, reer Falastiina dhulkooda ayey joogaan. Balse sababta uu qodobka koowaad ugu hadalhaynta batay waa in la rabo qodobka aqoonsiga iyo saldhiga in tashuush lagu furo. Markaa janbal lasoo tuuray ha iska qaadanina.